Ish-kirurgu francez Joel Le Scouarnec është dënuar me 20 vite burg për abuzim seksual ndaj 299 pacientëve, shumica fëmijë, gjatë periudhës 1989–2014. Gjatë gjyqit, i cili zgjati 14 javë, ai pranoi akuzat në një seancë me dyer të mbyllura, duke pranuar se shumë prej viktimave ishin nën anestezi gjatë abuzimit.
Le Scouarnec, tashmë 74 vjeç, ndodhet në burg që nga viti 2020, kur u dënua me 15 vite për përdhunim dhe abuzim ndaj katër fëmijëve, përfshirë edhe mbesa të tij. Hetimet e mëvonshme zbuluan ditarë ku ai kishte dokumentuar në detaje grafike krimet e tij, duke ndihmuar autoritetet të identifikonin qindra viktima të tjera.
Gjatë gjykimit, dhjetëra viktima dëshmuan për traumën e thellë që kanë përjetuar. Dy prej tyre kanë humbur jetën nga vetëvrasja si pasojë e traumës, gjë për të cilën Le Scouarnec u shpreh “përgjegjës”.
Pavarësisht përmasave të rastit, viktimat dhe familjarët e tyre kanë kritikuar mungesën e reagimit nga autoritetet dhe politika, duke theksuar se Le Scouarnec kishte një precedent penal që nga viti 2005 për shkarkim të materialeve pedofile, por kishte vijuar të punonte në sistemin shëndetësor.
“Shpresoj që ky rast të shërbejë si një thirrje zgjimi për institucionet,” tha nëna e një viktime. Protesta dhe reagime publike shoqëruan shpalljen e vendimit, ndërsa viktimat kërkojnë drejtësi dhe ndryshime sistemike për të parandaluar raste të tilla në të ardhmen.