Këshilltari i PS, Aldo Merkoçi, deklaroi sot në mbledhjen e Këshillit Bashkiak se vendimi për shkarkimin e kryebashkiakut të Tiranës, Erion Veliaj, përbën një tjetërzim të padrejtë të votës së qytetarëve. Ai e cilësoi këtë një moment unik në historinë e demokracisë shqiptare, duke theksuar se për herë të parë po zhvishet nga mandati një kryetar i zgjedhur tri herë radhazi.
Merkoçi paralajmëroi se vendimi krijon një precedent të rrezikshëm për autonominë vendore dhe parimet demokratike. Ai shtoi se këshilltarët po bëjnë një zgjedhje të detyruar, në shkelje të drejtësisë dhe të të drejtave të një individi të zgjedhur me votë të lirë, për të lehtësuar një ngërç vendimmarrjeje dhe për të mundësuar një normalizim të procesit gjyqësor.
“Qytetarët e Tiranës tri herë radhazi e kanë shprehur qartë vullnetin e tyre, i cili po tjetërsohet padrejtësisht. Ky vendim nuk është i lehtë dhe historia do të na gjykojë,” tha Merkoçi, duke shtuar se vendimmarrja sot është një zgjedhje mes drejtësisë dhe perceptimit publik.
Ai theksoi se vendimi duhet të merret me ndërgjegje dhe respekt për qytetarët, parimet e drejtësisë dhe kontributin e Veliajt për zhvillimin e qytetit.