FIER– Këtë të hënë është shtyrë seanca në Gjykatën e Fierit për Fredi Belerin, i cili ka kërkuar lirimin me kusht nga qelia, pas 1 viti e dy muajsh heqje lirie.
Beleri mbërriti në ambientet e gjykatës i prangosur mëngjesin e sotëm, por vetëm pas 20 minutash nga mbërritja në ambientet e institucionit të drejtësisë është kthyer sërish në burgun e sigurisë së lartë të Fierit.
Kujtojmë se seanca e parë ishte planifikuar të zhvillohej më 25 Korrik, por nuk u mor asnjë vendim për shkak se Drejtoria e Burgjeve nuk paraqiti raportin e vlerësimit pasi mungonte dëshmia e penalitetit.
Ndërkohë sot, e hënë 29 Korrik 2024, seanca u shty për shkak të mungesës së dokumentacionit. Beleri u përfaqësua nga avokati Geni Gjyzari, ndërsa gjyqtari i çështjes është Alfred Konomi. Bëhet me dije se seanca e radhës do të zhvillohet pas dy ditësh më datë 31 Korrik.
Fredi Beleri po vuan dënimin prej datës 12 Maj 2023 dhe u dënua me 2 vite burg për blerje votash. Në zgjedhjet e 14 Majit të 2023 ai arriti të fitojë nga qelia, por nuk u betua si kryebashkiak i Himarës pasi KQZ e shpalli të pavlefshëm mandatin e tij. Beleri ka kërkuar lirinë në të gjitha shkallët e gjyqësorit, por kërkesat e tij janë rrëzuar.