Një konflikt i dhunshëm me armë zjarri dhe goditje fizike ndodhi pasditen e djeshme në zonën e Institutit në Tiranë, ku u përfshinë shtatë persona. Sipas policisë, dy vëllezër të moshës 22 dhe 25 vjeç kanë goditur me qytën e armës dy bashkëmoshatarë dhe më pas kanë qëlluar në drejtim të tyre, fatmirësisht pa shkaktuar të lënduar.
Në përleshje dyshohet se janë përfshirë edhe katër persona të tjerë, të cilët kanë ushtruar dhunë ndaj një 38-vjeçari dhe kanë kërcënuar me armë një 48-vjeçar – të dy kushërinj të të rinjve të sulmuar.
Pas ngjarjes, një prej autorëve është arrestuar për armëmbajtje pa leje, ndërsa dy persona të tjerë po hetohen në gjendje të lirë. Katër të tjerë janë shpallur në kërkim.
Gjatë operacionit, policia sekuestroi një armë zjarri tip pistoletë, municion luftarak dhe tre automjete. Hetimet vijojnë për zbardhjen e plotë të konfliktit dhe identifikimin e personave të tjerë të përfshirë.