Policia e Durrësit ka shoqëruar në komisariat një 45-vjeçar, me inicialet A. B., i cili dyshohet se kërcënoi kandidaten për deputete të “Shqipëria Bëhet”, Valbona Myhedin, gjatë një takimi elektoral në lagjen nr. 8.
Ngjarja u denoncua fillimisht nga kreu i subjektit politik, Adriatik Lapaj, përmes një reagimi në rrjetet sociale, ndërsa kandidatja bëri kallëzim zyrtar pranë Drejtorisë Vendore të Policisë.
Sipas autoriteteve, gjatë kontrollit fizik ndaj 45-vjeçarit u gjet një pistoletë plastike (lodër), që ai e mbante në brez dhe dyshohet se e përdori për të intimiduar kandidaten duke ngritur xhupin dhe duke ia treguar si armë.
Nga hetimet paraprake rezulton se autori i dyshuar vuan nga probleme të shëndetit mendor dhe është i evidentuar nga shërbimi psikiatrik.
Reagim i Drejtorisë Vendore të Policisë Durrës
Në lidhje me një deklaratë të bërë publike në rrjetet sociale nga shtetasi A. L., drejtues i subjektit politik “Shqipëria Bëhet”, se një person i armatosur në Durrës ka kërcënuar me armë kandidaten për deputete të këtij subjekti, znj. V. M., dhe aktivistët që e shoqëronin, teksa ajo zhvillonte takime me qytetarët në lagjen nr. 8, sqarojmë se:
Strukturat e Drejtorisë Vendore të Policisë Durrës, sapo janë njohur me denoncimin publik të bërë nga z. A. L., menjëherë kanë nisur punën për verifikimin e rastit.
Shërbimet e Policisë, gjatë veprimeve në terren, kanë bërë të mundur identifikimin e personit dhe kanë vijuar kontrollet për lokalizimin dhe kapjen e tij.
Ndërkohë, në Drejtorinë Vendore të Policisë Durrës është paraqitur për të bërë kallëzim kandidatja për deputete, znj. V. M.
Si rezultat i reagimit të menjëhershëm dhe kontrolleve intensive në terren, rreth orës 21:15, shërbimet e Policisë bënë të mundur lokalizimin, kapjen dhe shoqërimin në ambientet e DVP Durrës të shtetasit A. B., 45 vjeç, banues në Durrës. Gjatë kontrollit fizik, këtij shtetasi iu gjet një pistoletë plastike (lodër), të cilën 45 vjeçari e mbante në brez dhe dyshohet se ka ngritur xhupin duke ja treguar shtetases V.M për të kërcënuar.
Nga verifikimet e kryera rezulton se 45-vjeçari vuan nga probleme të shëndetit mendor dhe është i regjistruar dhe i evidentuar nga shërbimi psikiatrik.
Nën drejtimin e Prokurorisë vijojnë veprimet procedurale në ngarkim të tij.
Drejtoria Vendore e Policisë Durrës siguron qytetarët dhe subjektet politike se shërbimet e Policisë janë tërësisht të angazhuara për të garantuar rendin dhe sigurinë gjatë gjithë procesit zgjedhor, të baraslarguara nga subjektet politike dhe vetëm në shërbim të ligjit.