Deputetja demokrate, Flutura Açka i është drejtuar kreut të SPAK, Altin Dumanit i cili po raportonte sot në Parlament nëse “ A keni frikë mos po organizohet një puç për t’ju prerë krahët dhe për t’ju hequr ca pende nga disa që nuk pëlqejnë që ju jeni në piedestal”.
Kryetari i Prokurorisë së Posaçme Antikorrupsion Dumani, theksoi se ky institucion është tërësisht i pavarur.
“Nuk e di çfarë keni parasysh me këtë pyetje. Dua të them që SPAK është një institucion i pavarur dhe korniza e tij kushtetuese garanton pavarësinë e institucionit. Parlamenti pastaj është çështje e vlerësimit të parlamentit. Nuk mund të komentoj veprimtarinë e një institucioni sikurse është Kuvendi”.
Dumani u shpreh se fokusi i punës së tij dhe SPAK-ut është hetimi i të gjitha rasteve dhe pse kërcënimet janë të shumta.
“Ajo që unë bëj është që të përpiqemi të hetojmë çështje të suksesshme për ti demonstruar publikut dhe Kuvendit që SPAK po kryen detyrat e veta, po ushtron veprimtarinë kushtetuese, me synim përmbushjen e qëllimit për të cilin u krijuar. Është një luftë që nuk mbaron, por ne po përpiqemi me hapa të ngadaltë, por të sigurt”.