Një bombë shpërtheu mbrëmjen e së premtes, pak pas orës 21:30, pranë zyrave të Hellenic Train në bulevardin Syggrou të Athinës. Shpërthimit i parapriu një telefonatë paralajmëruese rreth orës 20:53, ku një person i panjohur njoftoi portalin Zougla dhe Gazetën e Redaktorëve, duke lënë një afat prej 35-40 minutash dhe duke theksuar se nuk bëhej fjalë për një farsë.
Forca e shpërthimit ishte aq e madhe, sa u dëgjua deri në sheshin Sintagma, ku në atë moment po mbahej një protestë nga pensionistët. Sipas informacioneve paraprake, mjeti shpërthyes ishte vendosur në një çantë shpine të mbyllur me dryn, e vendosur mbi një motoçikletë pa targa.
Ky rast kujton sulmin ndaj Ministrisë së Punës rreth një vit e gjysmë më parë, ku u përdor i njëjti lloj mekanizmi. Në vendngjarje mbërritën specialistë të Departamentit të Asgjësimit të Mjeteve Shpërthyese (TEEM) të Policisë Greke, por nuk patën kohë të kryejnë një shpërthim të kontrolluar.
Fatmirësisht nuk ka të lënduar, ndërsa dëmet materiale mbeten të paqarta për shkak të bllokimit të zonës, deri në përfundimin e hetimeve. Në vendngjarje ndodhen gjithashtu gjashtë zjarrfikës me dy automjete, ndërsa mbetjet e bombës janë sekuestruar për analiza laboratorike.
Kompania Hellenic Train është aktualisht në qendër të hetimeve për tragjedinë e Tempi, që ndodhi dy vite më parë dhe la pas 57 viktima, shumica të rinj. Shpërthimi ndodhi vetëm pak orë pas një konference të organizuar nga komisioni i prindërve të viktimave, ku u hodhën poshtë gjetjet e komisionit shtetëror për aksidentin, duke akuzuar qeverinë për mungesë transparence.
Ngjarja ka rindezur tensionet politike në vend, me opozitën që vazhdon të kritikojë qeverinë Mitsotakis për fshehje të përgjegjësisë në aksidentin tragjik.