Marin Abazaj, i cili mban shiritin e kapitenit te ballshiotët, është shfaqur mjaft optimist para kësaj sfide. Ai ka theksuar për “Panorama Sport” se Bylisi është ekip më i mirë se Teuta dhe se fitorja do të vijë, pasi ballshiotët prodhojnë lojë.
“Kemi pasur oshilacione, mungesa nga dëmtimet dhe kartonët, apo edhe lojtarë të cilët kanë ardhur me vonesë. Nga ndeshja me Teutën kam besim se do të ndryshojë gjithçka për Bylisin. Do të hyjmë në fushë që ta mundim Teutën, tani nis kampionati i Bylisit dhe fitorja do të na vlejë shumë moralisht, por edhe për pikët në klasifikim. Do t’ia dalim, sepse kemi një grup me lojtarë cilësorë. Kemi kualitet dhe konkurrencë, me Skënderbeun patëm raste më shumë se korçarët dhe goditëm edhe shtyllën. Teuta ka ecuri të mirë, por nuk ka ndonjë diferencë cilësie me ne. E ka edhe historinë kundër në Ballsh, ku ka shumë vite pa fituar. Jam i bindur se do t mundim dhe do ta nisim mbarë fazën e dytë, aq më tepër që luajmë në shtëpinë tonë”, ka thënë Abazaj, mbrojtësi dhe kapiteni i Bylisit.
Ballshiotët pritet që sot të zbresin në fushë me lojtarët që u aktivizuan ndaj Skënderbeut një javë më parë. Ata mund të rreshtohen me skemën 3-5-2, ku Mahmuti do të jetë djathtas dhe Berko në sulm si titullar. Bylisi do të ketë sot mbështetje maksimale nga tifozët e vet, pavarësisht se rezultatet kanë qenë zhgënjyese./PanoramaSport