Një tjetër goditje e bujshme kundër krimit të organizuar shqiptar vjen nga Londra. Interpol Tirana, në bashkëpunim me njësinë e të kërkuarve të NCA (Agjencia Kombëtare e Krimit në Britani), ka arrestuar në një operacion të fshehtë shqiptarin Lorenc Lala, 47 vjeç, i njohur ndryshe edhe si Kristian Lala.
I shumëkërkuari akuzohet nga drejtësia shqiptare për konspiracion për vrasje dhe është i dyshuar si njeriu që financoi ekzekutimin makabër të Albi Bashaliut në Peqin, duke paguar 50 mijë euro për vrasësin famëkeq Laert Haxhiu.
Sipas dosjes së siguruar nga Top Channel, Lala konsiderohet pjesë e grupit të Haxhiut, ndërsa pagesa për vrasjen dyshohet se i është dorëzuar drejtpërdrejt Laert Haxhiut, i cili më pas mobilizoi ekzekutorët.
Në rrëfimet e bashkëpunëtorit të drejtësisë, Artan Tafani, zbulohet se vrasja e Bashaliut është kryer nga vetë Tafani së bashku me Lulzim Arapin, Bledar Berberin, Enrico Xhahysa dhe Laert Haxhiun.
Lorenc Lala u prangos në Britani dhe aktualisht ndodhet në paraburgim deri më 24 qershor, kur do të dalë sërish përpara gjykatës së ekstradimeve në Londër.
Ky është një tjetër zhvillim tronditës që hedh dritë mbi aktivitetin e egër të grupeve kriminale shqiptare që veprojnë në disa shtete europiane.