Policia e Elbasanit ka vënë në pranga një 41-vjeçar të shpallur në kërkim ndërkombëtar, i cili do të ekstradohet drejt Spanjës për veprat penale “Kultivimi i bimëve narkotike” dhe “Vjedhja e energjisë elektrike”.
Operacioni u realizua nga shërbimet e Policisë Rrugore në bashkëpunim me specialistët e Seksionit për Hetimin e Trafiqeve dhe Narkotikëve të DVP Elbasan, pas informacioneve të shkëmbyera me Interpol Tiranën. Shtetasi E. B., 41 vjeç, u kap teksa qarkullonte me automjet në rrugën e fshatit Papër.
Ky arrest vjen pas një urdhri ndërkombëtar të lëshuar nga Gjykata e Sabadellit më 30 qershor 2025, e cila e kishte shpallur në kërkim E. B. për kultivim të bimëve narkotike dhe vjedhje të energjisë elektrike.
Interpol Tirana, në koordinim me homologët spanjollë, do të kryejë të gjitha procedurat për ekstradimin e të arrestuarit drejt Spanjës, ku ai do të përballet me drejtësinë për akuzat e rënduara.