Një kandil deti me përmasa gjigante është shfaqur në ujërat e plazhit Willard në jug të Portlandit, duke alarmuar autoritetet lokale, të cilat u kanë bërë thirrje pushuesve dhe notarëve të mos e prekin për asnjë arsye.
Kandili, i përmasave rreth 60 cm në diametër dhe me tentakula që zgjaten mbi 2 metra, i përket llojit të njohur si kandil deti me krifë luani (Cyanea capillata), një specie që zakonisht haset në ujëra të ftohta si ato të Arktikut, Alaskës dhe bregdetit të Uashingtonit.
“Mos e prekni! Të pickon,” paralajmëroi qyteti përmes një postimi në Facebook, duke shoqëruar njoftimin me një foto të krijesës detare. “Është e bukur për t’u parë, por nëse e shihni në breg, njoftoni menjëherë një roje bregdetare që ta rikthejë në det.”
Dr. Jerome Piniti nga Instituti i Kërkimeve të Gjirit të Maine shpjegoi se edhe pse pickimi i kandilit zakonisht nuk është i rrezikshëm, ai mund të shkaktojë dhimbje të mprehtë, acarim të lëkurës dhe në raste më të rralla, simptoma më serioze si marramendje, vështirësi në frymëmarrje apo probleme me zemrën – veçanërisht te personat alergjikë.
Këshilla për pushuesit: nëse pickoheni, mos përdorni ujë të ëmbël, por hiqni tentakulat me kujdes duke përdorur rërë ose ujë deti. Autoritetet vijojnë monitorimin për të siguruar që krijesa të kthehet në habitatin e saj pa rrezikuar njerëzit në breg.