Zjarre masive kanë përfshirë pjesë të mëdha të Kanadasë, duke detyruar mbi 17,000 banorë të largohen nga shtëpitë e tyre në provincën e Manitobës. Flakët, të nxitura nga temperaturat e larta dhe moti ekstremisht i thatë, po përhapen me shpejtësi, duke krijuar kushte të rrezikshme për jetën dhe pronën.
Në rajonet më të izoluara, evakuimi është bërë i mundur vetëm përmes ndërhyrjes ajrore të ushtrisë dhe ekipeve të emergjencës. Autoritetet kanë shpallur gjendje të jashtëzakonshme në provincat Manitoba dhe Saskatchewan, ku situata konsiderohet “jashtë kontrollit” në disa zona.
Qendra Kanadeze për Koordinimin e Zjarreve Pyjore ka paralajmëruar se kushtet aktuale janë ekstreme dhe mund të përkeqësohen në ditët në vijim. Vetëm në Saskatchewan janë 17 vatra aktive zjarri, nga të cilat tetë nuk mund të kontrollohen.
Kryeministri i kësaj province, Scott Moe, bëri thirrje për ndihmë dhe theksoi se “katër deri në shtatë ditët e ardhshme janë vendimtare”, duke shpresuar në reshje të mëdha shiu për të zbutur situatën.
Evakuime të detyruara janë urdhëruar edhe në provincat Alberta dhe Kolumbia Britanike, ndërsa tymi i dendur është përhapur përtej kufirit, duke ndikuar edhe në disa shtete të SHBA-së.