Një aksident i rëndë u regjistrua pasditen e sotme në fshatin Rrjoll, Malësi e Madhe, ku një kamion ka humbur kontrollin dhe ka dalë jashtë rrugës. Ngjarja ndodhi rreth orës 16:00, ndërsa drejtuesi i kamionit, shtetasi N. P., po udhëtonte me mjetin e tij.
Si pasojë e daljes nga rruga, automjeti është rrëzuar, duke shkaktuar dëmtime te drejtuesi dhe te pasagjeri G. P. Të dy ndodhen aktualisht në Spitalin Rajonal Shkodër, jashtë rrezikut për jetën.
Megjithatë, ngjarja ngre pyetje mbi gjendjen e rrugëve dhe masat e sigurisë për transportin e mjeteve të rënda në zonat malore, pasi humbja e kontrollit në një kamion nuk është thjesht një incident i rastësishëm. Grupi hetimor po vijon punën për të sqaruar rrethanat e aksidentit.