Rritja e pagave në administratë e ka çuar rrogën mesatare në nivelet rreth 1 mijë euro në muaj. Megjithatë, kjo pagesë konsiderohet e ulët për profesionet e kërkuara si banakierë, kamerierë, kuzhinierë, bariste, dhe për të cilat kërkesa është rritur shumë për shkak të turizmit në zonat bregdetare. Këto profesione po paguhen mesatarisht 1300-2000 euro në muaj.
Në sektorin e ndërtimit, kantieret e hapura po kërkojnë punëtorë, dhe kompanitë e ndërtimit kanë rritur pagesat për ustallarët në rreth 70-80 euro në ditë, duke e arritur një pagë mujore prej më shumë se 1700 euro. Marangozët, hidraulikët, dhe elektricistët po ashtu kanë pagesa mujore që variojnë nga 60-70 euro në ditë.
Grup-profesionet si “Manaxherët, Ligjvënësit, Nëpunësit e lartë të administratës shtetërore dhe drejtorët ekzekutivë” ofrojnë pagat mesatare mujore bruto më të larta, krahasuar me nivelin kombëtar, të rregjistruara në rreth 1200 euro në muaj. Sektori privat ofron pagën më të lartë mesatare në aktivitetet financiare dhe të sigurimit, afro 1340 euro për muaj. Kështu, të gjitha këto profesione fizike, jo të lidhura me arsimin, kanë pagesa më të larta se mesatarja në sektorin privat.