Seno Fishta, ish-banori i edicionit të pestë të “Big Brother VIP”, ishte i ftuar këtë të diel në emisionin “S’e Luan Topi” me Erjona Rusin, ku për herë të parë foli hapur për jetën e tij private, familjen dhe varësinë e gjatë nga lojërat e fatit.
Gjatë intervistës, ai tregoi se problemet familjare nuk lidhen drejtpërdrejt me arrestimin e tij, por me presionin psikologjik që emigracioni sjell në shumë familje shqiptare. Seno theksoi se bashkëshortja e tij, Edra, ka qenë gjithmonë e përkushtuar ndaj familjes, ndërsa ai pranoi se fajin për debatet dhe largimet e herëpashershme e mban vetë.
I pyetur për ndikimin e varësisë nga lojërat e fatit në marrëdhënien e tyre, Seno zbuloi se kjo varësi kishte nisur vite më parë, gjatë qëndrimit të tij në Shqipëri, shumë përpara emigrimit. Ai rrëfeu se për rreth 6–7 vite, kryesisht në Shkodër, luante çdo ditë, duke shkaktuar humbje që arrinin në rreth 300 mijë euro.
Fishta shtoi se jashtë Shqipërisë nuk është përfshirë më në lojërat e fatit dhe se ka pasur mbështetjen e familjarëve për ta kapërcyer këtë periudhë të vështirë të jetës së tij.