Miliarderi Elon Musk, financuesi më i madh politik në SHBA për vitin 2024 dhe mbështetës kyç i Donald Trump, ka deklaruar se do të tërhiqet nga skena e donacioneve politike, të paktën për një periudhë kohe.
Në një fjalim përmes videokonference në Forumin Ekonomik të Katarit, Musk u shpreh:
“Sa i përket shpenzimeve politike, do të bëj shumë më pak në të ardhmen. Mendoj se kam bërë mjaftueshëm.”
Megjithatë, ai nuk e përjashtoi mundësinë për të kontribuar sërish, nëse lind një arsye e fortë.
Musk theksoi se aktualisht nuk sheh ndonjë motiv për të vijuar me financime të mëdha politike dhe distancoi vendimin e tij nga kritikat për mbështetjen ndaj administratës Trump:
“Nëse ka një arsye për të shpenzuar përsëri për politikë, do ta bëj. Por tani për tani nuk shoh asnjë.”
290 milionë dollarë për Trumpin dhe konservatorët
Musk rezulton të ketë dhënë mbi 290 milionë dollarë për fushatën presidenciale të Trump dhe për Komitetin Pro-Trump që ai vetë ndihmoi të themelohej. Raportohet se kishte premtuar edhe 100 milionë dollarë të tjerë për zgjedhjet afatmesme të vitit 2026.
Ai gjithashtu shpenzoi rreth 25 milionë dollarë në zgjedhjen për Gjykatën Supreme të Wisconsin, duke mbështetur një kandidat konservator, i cili në fund humbi.
Kthim tek biznesi, më pak politikë
Pas një periudhe të ngarkuar me angazhime politike, Musk duket se po zhvendos vëmendjen drejt perandorisë së tij të biznesit. Pas rënies së ndjeshme të fitimeve të Teslës, ai i ka premtuar analistëve se do të përqendrohet më shumë te kompanitë e tij dhe më pak në Uashington.
Megjithatë, ai konfirmoi se këtë javë do të ndodhet në kryeqytetin amerikan për disa takime, përfshirë një darkë të planifikuar me Donald Trump.