Milan-Juventusi synon të bëjë ndryshime të mëdha gjatë këtij viti, me lëvizje në hyrje dhe dalje për të tentuar të ndërtojë një ekip i cili të luftojë për titullin dhe jo vetëm për të hyrë në zonën Champions. Objektivat që raportohet se kanë piketuar bardhezinjtë, janë dy ish-futbollistë të Milanit.
Prej ditësh flitet për interes dhe kontakte të Juventusit me Teo Hernandez. Mbrojtësi i majtë është një nga emrat që pëlqehet nga Spaleti dhe ka pasur një kontakt mes palëve për të mësuar nëse ai është i gatshëm të kthehet në Itali. Megjithatë, ky plan është për verën, pasi për momentin Juventusi nuk ka mundësinë të afrojë një lojtar si francezi, i cili aktualisht përfiton një rrogë marramendëse në Arabinë Saudite.
Ai që mund të vijë tani, është mesfushori Frank Kesi. Futbollisti nga Bregu i Fildishtë, është që nga viti 2023 pjesë e skuadrës së Al Ahli në Arabinë Saudite, por po mendon kthimin përsëri në futbollin e rëndësishëm në Europë. Nëse ai arrin të shkëputet nga Al Ahli, Juventus do t’i hapte që në janar dyert për futbollistin, me të cilin kishte pasur disa bisedime edhe gjatë verës.