Ish-presidenti i SHBA-së, Joe Biden, u shfaq për herë të parë publikisht pas njoftimit të muajit të kaluar se është diagnostikuar me kancer agresiv të prostatës. Në një deklaratë për gazetarët, Biden shprehu optimizëm për shëndetin e tij.
“Parashikimi është i mirë. Po ndjek një trajtim me ilaçe dhe gjithçka po ecën mirë,” tha ai. Biden theksoi se kanceri nuk është përhapur në organe të tjera apo kocka, duke shprehur shpresë për një rikuperim të plotë. “Jam mirë, dhe edhe familja ime është optimiste,” shtoi ai, duke përmendur se trajtohet nga “një nga kirurgët më të mirë në botë.”
I pyetur për kritikat mbi aftësitë e tij mendore dhe fizike gjatë kohës në detyrë, Biden iu përgjigj me humor: “E shihni, jam i paaftë mendërisht dhe nuk mund të ec,” duke buzëqeshur. Përkundër zërave brenda Partisë Demokratike që kundërshtuan rikandidimin e tij, Biden tha prerë: “Pse nuk dolën përballë meje? Sepse do t’i kisha mundur.”
Ish-presidenti theksoi gjithashtu rëndësinë e momentit aktual për botën: “Jemi në një pikë kthese. Vendimet që do të marrim tani do të përcaktojnë se si do të jetë bota për 20 vitet e ardhshme.”
Në lidhje me tensionet me Shtëpinë e Bardhë dhe zëdhënësen Karoline Leavitt, e cila kishte kërkuar publikisht që ish-Zonja e Parë, Jill Biden, të fliste hapur për shëndetin e burrit të saj, duke e akuzuar se ka mashtruar opinionin publik, Biden reagoi me ironi: “Nuk e di kush është ajo zëdhënëse,” duke shtuar më pas se po bënte shaka, megjithëse mediat mund ta marrin fjalë për fjalë.