BRITANI E MADHE- Jessie J, artistja britanike ka ndarë një lajm prekës me ndjekësit e saj në rrjetet sociale, duke treguar se është diagnostikuar me kancer në gji.
Këngëtarja 37-vjeçare ka thënë se sëmundja është kapur në fazë të hershme, duke shtuar në një video emocionale: “Kanceri është i tmerrshëm në çdo formë, por po kapem pas fjalës ‘herët’.”
Jessie, emri i vërtetë i së cilës është Jessica Cornish, deklaroi se diagnoza i është dhënë para publikimit të këngës së saj më të fundit No Secrets, e cila doli më 25 prill. Ajo shtoi se do t’i nënshtrohet një operacioni pas performancës së saj në Summertime Ball në Londër, më 15 qershor.
No Secrets është rikthimi i madh i Jessie J pas një pauze katërvjeçare, gjatë së cilës u bë nënë e një djali, Sky, tani 2 vjeç, që ka me partnerin e saj, basketbollistin Chanan Colman.
Në videon e shpërndarë, Jessie u shpreh:
“Për pak hezitova nëse duhet ta ndaj apo jo. Dua ta ndaj, por ka shumë opinione nga jashtë… Gjithmonë kam qenë një person që ndan gjithçka që kalon në jetë.”
Ajo shpjegoi se gjatë gjithë kësaj periudhe ka qenë në analiza dhe kontrolle mjekësore, por se nuk e ka përpunuar plotësisht lajmin sepse ka qenë shumë e fokusuar në punë:
“Nuk po e përpunoj siç duhet, sepse po punoj pa pushim.”
Jessie shtoi gjithashtu se operacioni do të ndodhë gjatë verës dhe, me humorin që e karakterizon, tha:
“Do të mbaj thithkat, kjo është diçka e mirë. Është një temë e çuditshme dhe një situatë e çuditshme.”