Airyn De Niro, 29-vjeçarja dhe vajza e aktorit të njohur Robert De Niro me ish-partneren Toukie Smith, ka deklaruar publikisht se është transgjinore, në një intervistë të sinqertë për revistën Them.
“Jam një lule që ka lulëzuar vonë,” tha Airyn, duke rrëfyer se ndonëse ka shfaqur një identitet më femëror që në shkollë të mesme, vetëm në nëntor 2024 nisi terapinë hormonale dhe tranzicionin fizik. Frymëzimin për këtë hap e ka marrë nga figura si Laverne Cox dhe Michaela Jaé Rodriguez, ndërsa theksoi se krenaria për ngjyrën e saj, trashëguar nga nëna afrikano-amerikane, e ndihmoi të pranonte veten.
Ajo pranoi se një pjesë e saj ende ka pasiguri për mënyrën se si do të pritet nga familja, por theksoi dëshirën për të ndërtuar një jetë dhe karrierë të pavarur si këshilluese për shëndetin mendor.
“Babai ynë gjithmonë na ka shtyrë të ndjekim rrugën tonë. Unë nuk kam qenë pjesë e botës së famës,” tha Airyn, duke theksuar se dëshiron të njihet për vlerat dhe jo për mbiemrin që mban.
