Këngëtari Besart Kelmendi, i njohur me emrin artistik Gjesti, ka deklaruar para gjykatës se veprimet për të cilat dyshohet i ka kryer në gjendje emocionale dhe nën ndikimin e afektit.
Sipas dosjes së Prokurorisë të siguruar nga Betimi për Drejtësi, Kelmendi ka kërkuar falje para gjykatës, prokurorit dhe palës së dëmtuar.
“Pajtohem me deklarimin e avokatit tim. Dua ta njoftoj gjykatën se jam në ankth dhe kam vepruar në gjendje afekti. I kërkoj falje gjykatës, prokurorit dhe palës së dëmtuar”, ka deklaruar ai gjatë seancës.
Avokati i tij ka kundërshtuar kërkesën e Prokurorisë për caktimin e paraburgimit, duke argumentuar se nuk ekziston rreziku që i dyshuari ta përsërisë veprën penale.
Sipas mbrojtjes, bazuar në përvojën jetësore dhe aspektin psikologjik, reagimet impulsive zakonisht ndodhin vetëm një herë dhe rreziku i përsëritjes së tyre është i ulët.
Avokati ka theksuar gjithashtu se rasti ka marrë vëmendje të madhe publike dhe se Kelmendi është plotësisht i vetëdijshëm për hetimin që po zhvillohet ndaj tij.
Po ashtu, mbrojtja ka përmendur edhe nenin 159 të Kodit të Procedurës Penale të Kosovës, i cili parashikon parimin e proporcionalitetit në caktimin e masave të sigurisë, duke argumentuar se paraburgimi nuk do të ishte një masë proporcionale.
Sipas avokatit mbrojtës Artan Qerkini, për dy nga veprat penale për të cilat dyshohet Kelmendi parashikohet dënim deri në një vit burgim ose edhe gjobë.
Megjithatë, Gjykata Themelore në Prishtinë ka vendosur t’i caktojë këngëtarit masën e paraburgimit prej një muaji, duke vlerësuar se ekziston dyshimi i bazuar për kryerjen e veprave penale dhe rreziku i ikjes, ndikimit në dëshmitarë apo përsëritjes së veprës.
,
Kelmendi dyshohet për veprat penale: kanosje, dëmtim të pasurisë, mbajtje pa leje të armës.
Sipas dokumenteve të gjykatës, gjatë arrestimit policia i ka sekuestruar një armë të tipit Radikal RP-X9, kalibër 9 mm, me një karikator me 14 fishekë.
Ngjarja dyshohet të ketë ndodhur më 11 mars 2026, rreth orës 14:50, në ambientet e studios muzikore Onima.
Sipas dëshmitarëve, Kelmendi kishte hyrë në objekt duke kërkuar drejtorin e kompanisë dhe kishte kërcënuar se do të thyente pajisjet nëse ai nuk paraqitej.
Dëshmitarët kanë deklaruar se ai kishte goditur dhe thyer disa kompjuterë, kishte nxjerrë një armë nga çanta, kishte kërcënuar pronarin e kompanisë.
Sipas raportimeve të Betimi për Drejtësi, shkak i incidentit dyshohet të ketë qenë një mosmarrëveshje për një borxh paraprak me kompaninë. Paraburgimi ndaj këngëtarit është caktuar nga 11 marsi deri më 9 prill 2026.