Tensionet në Lindjen e Mesme janë përshkallëzuar më tej pas një sulmi ajror izraelit mbi një bazë ushtarake në perëndim të Teheranit. Sulmi, i raportuar nga agjencia iraniane e lajmeve Fars, solli në reagim sistemet e mbrojtjes ajrore të Iranit, të cilat u aktivizuan pas shpërthimeve.
Ndërhyrja ushtarake vjen menjëherë pas një paralajmërimi zyrtar të publikuar nga Forcat Mbrojtëse Izraelite (IDF), që u bënte thirrje qytetarëve të largoheshin nga Distrikti 3 i kryeqytetit iranian, duke theksuar se ndodhej në shënjestër për shkak të infrastrukturës ushtarake të regjimit iranian. “Prania juaj në këtë zonë vë jetën tuaj në rrezik”, thuhej në njoftim.
Sipas Sky News, IDF po zbaton një taktikë të ngjashme me atë që ka përdorur më parë në Gaza, ku lëshonte urdhra evakuimi para goditjeve në zona të banuara.
Zyrtarë izraelitë pretendojnë se tashmë kanë siguruar epërsi ajrore ndaj Iranit, një zhvillim që nëse konfirmohet, do të përfaqësonte një përshkallëzim të madh në përplasjen ndërmjet dy vendeve.