Autoritetet italiane kanë arrestuar tre shtetas shqiptarë në provincën e Bolonjës, të dyshuar për përfshirje në vjedhje banesash dhe posedim të sendeve të dyshuara si të vjedhura.
Sipas mediave italiane, të arrestuarit janë tre të rinj të moshës 22, 23 dhe 33 vjeç, të cilët dyshohet se vepronin në zonën e Bolonjës.
Operacioni i policisë u zhvillua në një zonë pranë Via Montebello, në shpatin e një kodre, ku forcat e rendit ndërhynë pranë një banese dhe ndaluan të dyshuarit.
Gjatë kontrollit në automjetin e tyre, policia italiane ka sekuestruar bizhuteri floriri dhe ora luksoze me vlerë dhjetëra mijëra euro, për të cilat dyshohet se janë përfituar nga vjedhje të ndryshme banesash.
Me urdhër të Prokurorisë Publike në Bolonja, të tre të arrestuarit janë shoqëruar në gjykatë për seancën e vërtetimit të masës së sigurisë, ndërsa ndaj tyre vijojnë hetimet për zbardhjen e plotë të rastit dhe verifikimin e origjinës së sendeve të sekuestruara.