Në një kohë kur bota përballet me konflikte dhe pasiguri, raporti më i fundit i “Global Peace Index 2025” (GPI) sjell pak dritë pozitive, sidomos për disa vende të Ballkanit.
Sipas të dhënave të publikuara nga Instituti për Ekonomi dhe Paqe, Islanda vazhdon të mbajë vendin e parë si vendi më i sigurt në botë — një pozicion që e ruan prej vitesh falë nivelit jashtëzakonisht të ulët të krimit, besimit të lartë tek institucionet dhe stabilitetit social. Në Islandë, krimi është i rrallë dhe policia zakonisht nuk mban armë.
Ndërkohë, vendet e rajonit kanë rezultate të ndryshme në listën prej 163 shtetesh. Sllovenia renditet ndër më të mirat, në vendin e 9-të, ndërsa Kroacia ndodhet në vendin e 19-të.
Maqedonia e Veriut është pozicionuar e 51-ta në këtë indeks, ndërsa Shqipëria renditet menjëherë pas saj, në vendin e 52-të. Kosova mban vendin e 63-të.
Lista dominohet sërish nga vendet evropiane, të cilat, sipas raportit, vijojnë të jenë zonat më të qëndrueshme dhe më të sigurta në botë.