Velipojë- Kishin ardhur në Shqipëri pasi ishin ftuar në një dasmë dhe më pas menduan të kalonin disa ditë pushime në plazhin e Velipojës. Por një aksident tragjik nga përplasja e dy jet-skive i mori jetën 19-vjeçarit italian, Nicola Iorio të dielën e 18 gushtit.
Ndërsa kunati i tij përfundoi në pranga për vrasje nga pakujdesia dhe e fejuara e tij e trishtuar për atë që u ndodhi.
E dashura e 19-vjeçarit, Giusy Di Tella, njëkohësisht dhe motra e të arrestuarit, Salvatore Di Tella, në një reagim thotë se ata nuk ishin as nën efektin e alkoolit dhe as të ndonjë droge në momentin kur ndodhi aksidenti në ujë.
“Dua të theksoj fort se ishte thjesht një aksident tragjik, një përplasje e papritur. Ne nuk kishim pirë as alkool e as drogë. Unë, i fejuari im dhe vëllai im kemi qenë gjithmonë shumë të lidhur bashkë.
Dy jet ski-të ishin larg njëra-tjetrës dhe ne nuk ishim aq larg bregut, ndryshe siç raportohet. Unë po xhiroja një video me celularin tim, kur Nicola më tha ta fikja. Në atë moment, pati një përplasje në anën e djathtë të jet ski-së tonë.
Vëllai im u hodh menjëherë në det për ta shpëtuar Nicolan dhe e nxori trupin e tij në breg, që më pas u transportua drejt spitalit, aty ku nuk arriti të mbijetonte. Por dua të ritheksoj se ishte thjesht një aksident tragjik.
Vëllai im nuk kishte asnjë faj, madje edhe familja e të dashurit tim thotë pikërisht këtë. Por këtu, në Shqipëri, ata domosdoshmërisht duan të gjejnë një fajtor: kjo është arsyeja pse ne kërkojmë ndihmë nga autoritetet italiane”, deklaron vajza italiane.