Zëvendëskryeministri dhe Ministri i Jashtëm i Pakistanit, Ishaq Dar, njoftoi se Irani ka rënë dakord të lejojë 20 anije të tjera nën flamurin pakistanez të kalojnë nëpër Ngushticën e Hormuzit, një nga korridoret më të rëndësishme për furnizimin global me energji.
Në një postim në rrjetin X, Dar e cilësoi këtë zhvillim si një “lajm të shkëlqyer”, duke sqaruar se dy anije do të lejohen të kalojnë çdo ditë. Ai e përshkroi vendimin e Teheranit si një hap pozitiv që mund të ndikojë në uljen e tensioneve në Lindjen e Mesme.
Ky zhvillim vjen në një moment kur Pakistani ka shtuar përpjekjet diplomatike për të shmangur përshkallëzimin e konfliktit mes SHBA-së, Izraelit dhe Iranit. Sipas raportimeve, këto ndërhyrje diplomatike kanë ndikuar edhe në shtyrjen e disa sulmeve të planifikuara amerikane ndaj objekteve iraniane.
Më herët gjatë ditës, burime nga Ministria e Çështjeve Detare konfirmuan se Irani kishte lejuar kalimin e dy anijeve mallrash pakistaneze, “Multan” dhe “P-Akili”, të cilat më parë ishin bllokuar pasi forcat iraniane morën kontrollin e ngushticës. Tashmë ato janë në rrugë drejt Karaçit dhe pritet të mbërrijnë më 31 mars.
Kjo është hera e dytë që Teherani lejon kalimin e anijeve pakistaneze që nga nisja e konfliktit më 28 shkurt, duke sinjalizuar një hap të kufizuar drejt lehtësimit të situatës në një rajon që mbetet ende nën tension të lartë.