Shqipëria shënon një moment historik në rrugën drejt anëtarësimit në Bashkimin Evropian. Ditën e hënë, më 17 nëntor, në Bruksel do të mbahet Konferenca e 7-të Ndërqeveritare Shqipëri–BE, ku do të çelet grupkapitulli i fundit i negociatave – një arritje rekord, pasi të gjithë kapitujt janë hapur brenda vetëm 12 muajsh.
Kryeministri Edi Rama, së bashku me kryenegociatoren Majlinda Dhuka, Ministren për Administratën Publike dhe Antikorrupsion Adea Pirdeni dhe delegacionin shqiptar, do të marrin pjesë në këtë ngjarje historike. Pas përfundimit të punimeve, Kryeministri Rama, Komisionerja për Zgjerimin e BE-së Marta Kos dhe Ministrja e Jashtme e Danimarkës Marie Bjerre do të mbajnë një konferencë të përbashkët për shtyp.
Grupkapitulli V: “Burimet, Bujqësia dhe Kohezioni” përfshin pesë kapituj kyç që lidhen me zhvillimin ekonomik dhe social të vendit:
Bujqësia dhe Zhvillimi Rural (kapitulli 11)
Politikat e sigurisë ushqimore, veterinarisë dhe fitosanitare (kapitulli 12)
Peshkimi (kapitulli 13)
Politika rajonale dhe koordinimi i instrumenteve strukturore (kapitulli 22)
Dispozitat Financiare dhe Buxhetore (kapitulli 33)
Ky kapitull synon modernizimin e bujqësisë, rritjen e kapaciteteve prodhuese, dixhitalizimin e zinxhirit ushqimor, si dhe forcimin e mekanizmave të kontrollit të sigurisë ushqimore sipas standardeve të BE-së. Sektori i peshkimit dhe akuakulturës do të përfitojë nga programet europiane për menaxhim të qëndrueshëm.
Në komponentin e kohezionit, Shqipëria do të përmirësojë menaxhimin e fondeve të BE-së dhe pjesëmarrjen në politikat e zhvillimit rajonal. Ndërsa kapitulli për dispozitat financiare dhe buxhetore synon harmonizimin me praktikat evropiane për transparencë dhe administrim efektiv të fondeve publike.
Hapja e këtij grupkapitulli përfaqëson një hap vendimtar drejt afrimit përfundimtar të Shqipërisë me BE-në, duke konsoliduar progresin e bërë dhe duke krijuar bazën për reforma më të thelluara në sektorët ekonomik, ushqimor dhe të zhvillimit të qëndrueshëm.