Një vit pas vrasjes që tronditi Italinë, nëna e 13-vjeçares shqiptare Aurora Tila, Morena Corbellini, ka folur për herë të parë pas vendimit të Gjykatës së të Miturve në Bolonja, e cila dënoi autorin e krimit me 17 vite burg.
Në një intervistë për Top Channel, Corbellini rrëfeu se ndonëse dënimi ishte maksimal sipas ligjit, ai nuk mund ta shlyejë humbjen e vajzës së saj.
“Ligjërisht, ndoshta është maksimumi që mund të jepej, por për mua si nënë nuk është i drejtë. Ai është gjallë, mund të qeshë dhe të mendojë për të ardhmen, ndërsa vajza ime nuk jeton më,” – tha ajo me dhimbje.
Corbellini sqaroi gjithashtu se Aurora nuk kishte asnjë lidhje dashurie me autorin, por vetëm një miqësi, e cila ishte keqinterpretuar nga mediat:
“Aurora ishte vetëm 13 vjeç. Ishte një vajzë e ëmbël, e turpshme, e mbyllur në vetvete. Gazetarët e quajtën ‘të dashurin’ e saj, por nuk ishte ashtu.”
Nëna e vajzës tha se instinkti i saj prindëror e kishte paralajmëruar për rrezikun që i kanosej vajzës:
“Ia ndalova ta takonte. Nuk e di pse, por diçka më thoshte se ai nuk ishte personi i duhur. Po të ishte gjallë, do t’i thoja se kisha të drejtë.”
E shkatërruar nga humbja, ajo ka vendosur të krijojë një shoqatë në kujtim të vajzës, për të ndihmuar prindërit dhe të rinjtë që përballen me situata të ngjashme. Shoqata do të quhet “Drita e Aurorës” (La Luce di Aurora).
“Jeta pa një fëmijë nuk është më jetë,” – përfundon ajo, me shpresën që asnjë nënë të mos përjetojë atë që po përjeton ajo.