FIER- Mashtrimet online nuk kanë të sosur. Pre e tyre ka rënë Fatjona, 24 vjecarja nga Fieri, nënë e dy fëmijëve.
“Djalin e kam nëntë vjeç, gocën e kam për shtatë. Prej shumë kohësh unë udhëtoj drejt shtetit të Gjermanisë, punoj kamariere. Arsyeja që unë iki jashtë shtetit është se unë jam e divorcuar, jam krah i vetëm për fëmijët e mi dhe gjëja që më peshon më shumë mbi supe është se e kam vajzën me tumor. Një rezonancë në muaj kushton 500 euro.”
Pra, përvec ushqimit, veshjeve, shkollimit, e shumë kërkesave të tjera që kanë fëmijët, Fatjona duhet të sigurojë edhe këtë shumë parash aq të domosdoshme për shëndetin e vajzës. Dhe kjo nevojë emergjente financiare e ka detyruar atë të shkelë disa herë afatin e pasaportës, veprim që ka detyruar autoritetet gjermane t’i japin ekspuls.
“Meqë nuk ikja dot në mënyrë të rregullt, gjej në Instagram një faqe, që premtonte kalime të sigurta në këmbim të 2500 eurove. Ramë dakord që fillimisht do t’i jepja 1400 euro. Ditën që u nisa për rrugë, takohem me shoqëruesin, ku më pas zbulova se ishte i njëjti person që fshihej pas faqes. Quhet Fatjon Shuli. Bashkë me ne ishin edhe dy çuna të tjerë, që donin të kalonin si unë. Tentuam të kalojmë disa herë nga Serbia, por na kapi policia.”
Në këto kushte, ata i kërkojnë Fatjonit që t’u kthejë lekët mbrapsht, përderisa nuk e përmbushi detyrën, por ai refuzoi në mënyrë kategorike.
“Faktikisht më vjen keq që po e them, po e kërcënova seriozisht që mezi mora lekët, se ndryshe s’i merrja dot. Erdhi pastaj më dha lekët, më ka dhënë 900 euro nga 1500, se të tjerat i prishi me alkool e me naftë rrugës. Kam vajt, kam punuar në Mal të Zi tre muaj për të bërë ato lekë për të ikur. U mashtruam, ishte dobësia jonë”, sqaroi bashkëudhëtari i Fatjonës.
Pas këtij dështimi të tretë me pasoja emocionale për të, Fatjona kthehet në Shqipëri dhe pasi çmallet me fëmijet e saj, telefonon Fatjonin, personin që i kishte zhvatur paratë. Por ai vazhdoi me justifikime, duke i bërë premtime të kota se do t’ja kthente lekët për 4 ditë. E pasi kaluan ditët, Fatjoni nuk u bë i gjallë. Ndodhur në këto kushte, Fatjona detyrohet t’i shkojë në banesë, ku takohet me familjen e tij, pasi Fatjoni kishte lëvizur jashtë shtetit. Të shokuar për çfarë kishte ndodhur, ata i kërkojnë ndjesë nënës 24-vjeçare dhe i sigurojnë paratë për më pak se 1 orë.
Më në fund Fatjona arriti të merrte mbrapsht mundin e saj. Në gjithë këto javë, ajo kishte bërë sakrifica të jashtëzakonshme për një femër, vetëm për të punuar ca muaj për lekët e rezonancave të vajzës, pa imagjinuar aspak se krahas vuajtjeve të njëpasnjëshme, përfshi edhe burgun, do të mashtrohej nga ky person që u fsheh si burracak./PIRANJAT