Seb Ponari, një shqiptar 34-vjeçar që jeton prej 16 vitesh në Angli, ka ndërmarrë një sfidë të jashtëzakonshme fizike dhe shpirtërore: përshkimin me vrap të një distance prej 2,750 kilometrash nga Cambridge në Angli deri në Tropojë, Shqipëri — brenda vetëm 40 ditësh.
I nisur më 10 maj, Sebi aktualisht ndodhet në Kroaci dhe ka përshkuar dhjetëra qytete e shtete përmes Europës. Ai vrapon çdo ditë rreth 70 kilometra, dhe synon të mbërrijë në varrin e babait të tij në Tropojë më 19 qershor, në përvjetorin e dhjetë të ndarjes së tij nga jeta.
“Ky vrap ia është kushtuar babait tim, por edhe të gjithë atyre që përballen me vështirësi të shëndetit mendor. Dua të tregoj që ka gjithmonë shpresë dhe forcë për ta kapërcyer çdo pengesë,” – tha Sebi në një intervistë për Euronews Albania.
Për të realizuar këtë rrugëtim të jashtëzakonshëm, ai ka ngritur një ekip mbështetës që përfshin një shofer-fizioterapist, një trajner personal dhe dy ndihmës. Ekipi lëviz me një rulot që ka kushtuar 43 mijë paund dhe dy mjete të tjera ndihmëse. Në total, Sebi ka shpenzuar rreth 130 mijë paund nga kursimet e tij për këtë projekt që e quan “udhëtimi i shpirtit”.
Me 15 palë atlete dhe vendosmërinë për të çuar një mesazh force dhe shprese, Sebi Ponari po sfidon kufijtë e trupit dhe mendjes, duke e kthyer rrugëtimin e tij në një thirrje të fuqishme për ndërgjegjësim mbi shëndetin mendor.