Një tjetër person i shpallur në kërkim ndërkombëtar është vënë në pranga nga strukturat e Policisë së Shtetit, në kuadër të operacionit policor të koduar “Fast”.
Sektori për Kërkimin (FAST Albania), pranë Drejtorisë së Forcës së Posaçme Operacionale, në bashkëpunim me strukturat operacionale të Drejtorisë Vendore të Policisë Durrës dhe Komisariatin e Policisë Kavajë, kanë lokalizuar dhe arrestuar në Kavajë një 26-vjeçar të kërkuar nga autoritetet italiane.
Në pranga ka rënë shtetasi S. B., 26 vjeç, banues në Kavajë, i cili u arrestua përkohësisht me qëllim ekstradimi drejt Italisë.
Sipas Policisë, 26-vjeçari ishte shpallur në kërkim ndërkombëtar nga Interpol Roma, pasi Gjykata e Breshias në Itali kishte caktuar ndaj tij masën e sigurisë “Arrest në burg” për veprën penale “Pjesëmarrje në organizatë kriminale me qëllim trafikimin e lëndëve narkotike”, vepër e parashikuar nga Kodi Penal italian.
Për këtë akuzë, sipas autoriteteve italiane, parashikohet një dënim maksimal deri në 24 vite burgim.
Nga hetimet e zhvilluara në Itali dyshohet se 26-vjeçari ka qenë pjesë e një organizate kriminale të përbërë kryesisht nga shtetas shqiptarë, por edhe nga shtetas italianë, e cila merrej me trafikimin e lëndëve narkotike dhe shpërndarjen e tyre në disa zona të Italisë.
Policia e Shtetit bën me dije se operacioni është pjesë e punës së vazhdueshme për lokalizimin dhe kapjen e personave të shpallur në kërkim ndërkombëtar.
Ndërkohë, Interpol Tirana, në bashkëpunim me Interpol Romën, vijon procedurat ligjore për ekstradimin e 26-vjeçarit drejt Italisë.