Vinícius Júnior ishte protagonisti absolut në fitoren 4-1 të Real Madrid ndaj Real Sociedad të shtunën.
Në mungesë të Kylian Mbappé, sulmuesi brazilian mori përgjegjësinë në repartin ofensiv, duke fituar një penallti dhe realizuar dy gola që vulosën triumfin e madrilenëve. Paraqitja e tij u vlerësua gjerësisht, duke konfirmuar rolin e tij si lider në sulmin e skuadrës.
Në një intervistë për Ibai Llanos, në videon “24 orë me Vini Jr”, ai foli për marrëdhënien me Mbappen dhe bashkëlojtarët francezë, Eduardo Camavinga dhe Ferland Mendy.
“Ne kalojmë më shumë kohë bashkë sesa me familjet tona, ndaj është e rëndësishme të kemi marrëdhënie të mira. Disa janë të martuar, të tjerë jo, por jemi gjithmonë pranë njëri-tjetrit. Çdo verë i dërgoja Kylianit mesazh dhe e pyesja: ‘Kur do të vish?’ Isha si agjenti i tij. Dua të luaj me më të mirët për të rritur shanset për të fituar”, u shpreh Vinicius.
Ai hodhi poshtë gjithashtu zërat për tensione në dhomat e zhveshjes: “Pjesa pozitive është që njerëzit të duan. Pjesa negative janë shtypi dhe tifozët kundërshtarë.”