Gjatë ditës së sotme policia ka vënë në pranga një 50-vjeçar i cili ishte nën masën e sigurisë “arrest në shtëpi”, në Belsh.
Mësohet se L. D., 50 vjeç ka ushtruar dhunë fizike ndaj të atit. Ndonëse i dënuar në arrest shtëpie po për të njëjtën vepër penale, 50 vjeçari vazhdon të njëjtin avaz.
Njoftimi i Policisë
Komisariati i Policisë Elbasan arrestoi në flagrancë shtetasin N. Gj., 36 vjeç, si dhe referoi materialet në Prokurori, ku nisi procedimi në gjendje të lirë për shtetasit L. B., 50 vjeç dhe R. M., 33 vjeç, pasi gjatë një konflikti për motive të dobëta, 36-vjeçari ka dëmtuar lehtë, me mjet prerës, shtetasin L. B., ndërsa 50-vjeçari dhe shtetasi R. M. (të afërm të njëri-tjetrit) kanë goditur me grushte dhe send të fortë, 36-vjeçarin.
Komisariati i Policisë Cërrik arrestoi në flagrancë shtetasit:
-L. D., 50 vjeç, banues në Belsh, pasi ka ushtruar dhunë ndaj babait të tij, ndërkohë që ishte me masë sigurie “Arrest në shtëpi”, për të njëjtën vepër penale;
-P. H., 62 vjeç, banues në Belsh, pasi ka goditur për shkak të detyrës punonjësit e Policisë Bashkiake, të cilët kanë shkuar për të hapur një rrugë që ky shtetas e ka bllokuar me pretendimin se është pronë e tij.
Komisariati i Policisë Librazhd arrestoi në flagrancë shtetasin B. A., 31 vjeç, banues në Prrenjas, pasi ka ushtruar dhunë ndaj bashkëshortes së tij, e cila u pajis me urdhër mbrojtjeje.
Më datë 11.08 2024, rreth orës 11:45, dyshohet se si pasojë e temperaturave të larta dhe mbetjeve prej qelqi të hedhura në tokë, ka rënë zjarr në fshatin Bardhaj, Prrenjas. Si pasojë e përhapjes së flakëve është djegur një sipërfaqe toke me shkurre dhe me barishte , si dhe është djegur pjesërisht një banesë aktualisht e pabanuar në pronësi të shtetasit P. B..
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.