Policia e Sarandës ka finalizuar me sukses operacionin e koduar “Impact”, që synonte goditjen e veprimtarisë kriminale të armëmbajtjes pa leje.
Si rezultat i kontrolleve të shtuara gjatë sezonit turistik dhe mbi bazën e informacioneve operative, u arrestua në flagrancë shtetasi kosovar Sh. M., 31 vjeç, banues në Gjilan.
Gjatë kontrollit në automjetin tip “Range Rover”, në zonën e Ksamilit, policia gjeti të fshehur në çantën e dorës të të arrestuarit një armë zjarri pistoletë tip “Beretta”, së bashku me një krehër me fishekë.
Arma, municioni dhe automjeti u sekuestruan si prova materiale. Materialet procedurale i janë referuar Prokurorisë pranë Gjykatës së Sarandës për veprime të mëtejshme.
Policia e Sarandës njofton se kontrollet do të vijojnë me intensitet për të garantuar sigurinë e qytetarëve, veçanërisht në zonat turistike gjatë sezonit veror.