Ministri i Brendshëm në detyrë i Kosovës, Xhelal Sveçla, ka deklaruar në Agjencinë për Parandalimin e Korrupsionit se ka marrë kompensim financiar në shumën prej 342 eurosh për humbjen e bagazhit të tij gjatë një udhëtimi zyrtar në Kroaci.
Kjo është bërë e ditur përmes formularit të deklarimit të pasurisë për vitin 2024, ku përveç këtij kompensimi, ministri Sveçla ka bërë publike edhe pasurinë e tij të përgjithshme. Ai ka deklaruar pronësi të përbashkët mbi një shtëpi me vlerë prej 600 mijë eurosh dhe një lokal biznesi në vlerë prej 650 mijë eurosh.
Sa i përket mjeteve të gatshme, Sveçla ka deklaruar se posedon 2,647 euro, të ardhura që vijnë nga paga e tij si ministër. Ai ka theksuar se gjatë vitit 2024 ka realizuar të ardhura vjetore nga paga në shumën prej 19,468 euro, ndërsa ka përfituar edhe 2,798 euro për mëditje nga udhëtimet zyrtare jashtë vendit.
Në pasurinë e luajtshme, Sveçla ka përfshirë një veturë të tipit “Hyundai” me vlerë prej 11 mijë euro, e cila është në pronësi të bashkëshortes dhe e blerë përmes kredie.
Ministri ka gjithashtu një kredi bankare në vlerë prej 19,500 euro, nga e cila i kanë mbetur për t’u shlyer edhe 18,396 euro.