Një ndërhyrje e shpejtë dhe profesionale e Policisë Kufitare në Himarë shmangu një ngjarje me pasoja të rënda në det, pasi një gomone po lëvizte me shpejtësi dhe jashtë kontrollit, pa asnjë person në bord.
Ngjarja u regjistrua pranë zonës së “Kepit të Rigonit”, përballë plazhit të Llamanit, ku shërbimet e Policisë Kufitare reaguan menjëherë pas sinjalizimit për mjetin lundrues që paraqiste rrezik për pushuesit dhe mjetet e tjera në det.
Nga verifikimet rezultoi se drejtuesi i gomones, shtetasi E.M., 35 vjeç, banues në Orikum, kishte rënë në det gjatë lëvizjes. Ai arriti të dilte në breg në gjirin e Llamanit, me dëmtime në këmbë, dhe u transportua në spital, ku ndodhet jashtë rrezikut për jetën.
Falë ndërhyrjes së Njësisë Policore Detare dhe Policisë Kufitare, gomonia u vu nën kontroll, ndërsa një efektiv arriti të hipte në bord dhe ta ndalonte mjetin, duke shmangur një aksident të mundshëm.
Më pas, gomonia u shoqërua në Pikën e Kontrollit Kufitar Himarë për verifikime të mëtejshme.
Policia Kufitare apelon për respektimin e rregullave të sigurisë gjatë lundrimit dhe rikujton se qytetarët mund të kërkojnë ndihmë në çdo moment duke telefonuar numrin e emergjencës 112.