KSAMIL– Një shtetas 30-vjeçar në Ksamil, i identifikuar si D.M., është proceduar penalisht pasi ushtronte pa licencë aktivitetin e këmbimit valutor dhe nuk lëshonte kuponë tatimor. Ndërkohë mësohet se kishte edhe persona të punësuar të pasiguruar.
Policia pas kontrolleve të bëra në ambientet e këmbimit valuator ka gjetur dhe sekuestruar 98.896 lekë, 368 euro, 26 paund dhe 2 laptopë.
NJOFTIMI I POLICISË:
Ushtronte pa licencë aktivitetin e këmbimit valutor dhe nuk lëshonte kuponë tatimor, si dhe kishte punonjës të pasiguruar, procedohet penalisht 30-vjeçari në Ksamil.
Sekuestrohen një shumë parash në lekë, euro dhe paund, si dhe 2 laptopë.
Gjatë veprimeve të kryera për zbardhjen e ngjarjes së ndodhur më datë 17.08.2024 në Ksamil, ku një 26-vjeçar u vu në pranga nga Oficerët e Policisë Gjyqësore pranë Prokurorisë Sarandë, pasi kundërshtoi me dhunë punonjësit e qarkullimit rrugor të Sarandës gjatë ushtrimit të detyrës për plotësimin e procesverbalit të shkeljes rrugore (parkim i gabuar), konkretisht në rrugën “Butrinti”, përballë një subjekti privat në administrimin e vëllait të 26-vjeçarit, shërbimet e Komisariatit të Policisë Sarandë, falë bashkëpunimit me qytetarët, kanë marrë informacion se në këtë subjekt ushtrohej aktiviteti i këmbimit valutor pa licencë.
Menjëherë në këtë subjekt është kryer kontroll dhe është konstatuar se shtetasi D. M., administrator i këtij subjekti, ushtronte pa licencë aktivitetin e këmbimit valutor dhe nuk lëshonte kuponë tatimor për shërbimet e ofruara, si dhe kishte punonjës të pasiguruar.
Në vijim të veprimeve procedurale, Seksioni për Hetimin e Krimit Ekonomik e Financiar referoi materiale në Prokurori dhe nisi procedimin penal për shtetasin D. M., 30 vjeç, banues në Ksamil.
Në cilësinë e provës materiale u sekuestruan 98 896 lekë, 368 euro, 26 paund dhe 2 laptopë.
