Pesë vjet pas pandemisë së koronavirusit, një alarm i ri vjen nga Instituti Pasteur lidhur me gripin e shpendëve. Ekspertët paralajmërojnë se një mutacion që e lejon virusin të transmetohet nga njeri te njeriu mund të shkaktojë një pandemi edhe më serioze se COVID-19.
Gripi i shpendëve përhapet mes shpendëve të egër dhe shtëpiake, si dhe disa gjitarëve, duke shkaktuar humbje të konsiderueshme në tufa dhe duke cenuar zinxhirin e furnizimit me ushqim. Edhe pse infeksionet njerëzore mbeten të rralla, ekspertët paralajmërojnë për rrezikun në rast të përshtatjes së virusit tek njerëzit.
Drejtoresha mjekësore e qendrës së infeksioneve të frymëmarrjes të Institutit Pasteur, Marie-Anne Rame Velti, thekson se viruset e gripit mund të infektojnë edhe njerëz të shëndetshëm, përfshirë fëmijët, duke rritur rrezikun e vdekshmërisë, ndryshe nga COVID-19, i cili prek kryesisht grupet e ndjeshme.
Nga viti 2003, sipas OBSH-së, janë regjistruar gati 1,000 shpërthime të gripit të shpendëve tek njerëzit, me një shkallë të lartë vdekshmërie, kryesisht në vende si Egjipti, Indonezia dhe Vietnami. Në SHBA është regjistruar së fundmi edhe lloji H5N5.
Megjithatë, ekspertët e vlerësojnë si të ulët probabilitetin që virusi të shkaktojë një pandemi të menjëhershme. Gregorio Torres nga Organizata Botërore për Shëndetin e Kafshëve thotë se duhet vigjilencë dhe përgatitje, por jeta e përditshme nuk kërkon kufizime të menjëhershme.
Rame Velti shton se përvoja nga COVID-19 ka përmirësuar ndjeshëm përgatitjen e komunitetit shkencor, duke përfshirë masa parandaluese, kandidatë vaksinash dhe stoqe barnash antivirale të gatshme për përdorim në rast nevoje.