Parlamenti grek ka miratuar të enjten një projektligj të ri për zgjatjen e orarit të punës, që u jep mundësi punëdhënësve të sektorit privat të kërkojnë deri në 13 orë pune në ditë, nga 8 që është aktualisht. Vendimi ka shkaktuar pakënaqësi të gjera në mbarë vendin, duke nxitur dy greva të përgjithshme vetëm gjatë këtij muaji.
Qeveria konservatore e Greqisë e justifikon ligjin si një masë për rritjen e fleksibilitetit dhe efikasitetit në tregun e punës, por sindikatat dhe protestuesit e shohin atë si një hap pas për të drejtat e punëtorëve, në një periudhë kur pagat janë të ngrira dhe kostoja e jetesës është në rritje të vazhdueshme.
“Kur pjesa tjetër e Evropës po diskuton për shkurtimin e orëve të punës, në Greqi ne po i zgjatojmë ato”, deklaroi për BBC-në baristi 41-vjeçar Themis Lytras, duke theksuar se qiraja e tij është dyfishuar gjatë dy viteve të fundit.
Sipas të dhënave të Bashkimit Evropian, Greqia është mes vendeve me orarin më të gjatë të punës në kontinent, me mesatarisht 40 orë pune në javë — një situatë që pritet të bëhet edhe më e rëndë me hyrjen në fuqi të ligjit të ri.