Grand Park Skyline, kompleksi i ri rezidencial dhe hotelier, që do të ndryshojë peizazhin urban të Tiranës, u vlerësua sot me çmimin “Best luxury” në mbrëmjen gala të shpërndarjes së çmimeve për sipërmarrësit, me rastin e 128 vjetorit të Dhomës së Tregtisë dhe Industrisë.
“Çmimi ‘Best Luxury’ shkon për Grand Park Skyline, projekti më i arrirë në arkitekturën shqiptare dhe kryesisht të Tiranës”, tha prezantuesja e eventit.
Ylli Ujka, administrator i kompanisë X-One, pjesë e Grupit IDA, i cili tërhoqi çmimin tha se si sipërmarrës që vjen nga diaspora, ka një mesazh për bashkëatdhetarët që jetojnë jashtë vendit, që të mos kenë frikë të investojnë në atdheun e tyre.
“Është nder e krenari për mua të jem prezent në vlerësimin e projektit Grand Park Skyline. Ky projekt luksoz në qendër të Tiranës, është pranuar nga gjithë brandet më luksoze të botës, hotelerisë dhe modës, e do të sjellë një risi për Shqipërinë, e cila nuk e ka pasur asnjëherë një qendër luksi siç e ka Milano, Londra e shumë shtete të zhvilluara. Tani Shqipëria po përparon e kryeqyteti po bën diferencën. Ky ndryshim vjen edhe falë sipërmarrjes e politikave të qeverisë. Kam një mesazh për gjithë shqiptarët e diasporës: unë jap shembullin tim, që vij në Shqipëri të investoj, secili prej nesh s’duhet të mendojë, si para disa vitesh, se është problem të shkosh në institucione. Ju siguroj që, si pushteti qendror, si ai lokal, është totalisht i disponueshëm. Shkoni në zyrat e institucioneve dhe do gjeni gjithçka ju nevojitet”, u shpreh Ujka.
Projekti përfshin dy kulla rezidenciale, një hotel me 5 yje, dhe një qendër komerciale, si destinacioni më i ri për markat më të njohura të modës.
Kompleksi unik do të ketë një sipërfaqe ndërtimi prej 145 mijë m², me 530 apartamente moderne, 184 dhoma hoteli, restorante, kafene, spa, palestër dhe mbi 800 vende parkimi nëntokësore.
Me shërbime 24/7 dhe hapësira për aktivitete të ndryshme, Grand Park Skyline do të bëhet një destinacion i preferuar për turistët dhe qytetarët.
Kompleksi rezidencial do të ndërtohet nga kompania X-One, pjesë e Grupit IDA, – një bashkim kompanish me eksperiencë të gjatë në fushën e ndërtimit dhe me kontribut në ndërtimin e disa veprave ikonike në Itali.