Një nga grabitjet më të mëdha bankare në historinë moderne të Gjermanisë dyshohet se ka ndodhur në qytetin perëndimor të Gelsenkirchen-it, ku persona ende të paidentifikuar kanë hyrë me forcë në një bankë dhe kanë vjedhur sende me vlerë që kapin shumën e rreth 30 milionë eurove.
Sipas burimeve dhe hetuesve të sigurisë gjermane, hajdutët kanë thyer një kasafortë që përmbante rreth 3 200 kuti sigurie, duke prekur drejtpërdrejt më shumë se 2 500 klientë. Autoritetet theksojnë se përmasat e grabitjes e bëjnë atë potencialisht një nga më të mëdhatë e regjistruara ndonjëherë në vend.
Ngjarja u zbulua në orët e para të mëngjesit të djeshëm, pasi u aktivizua alarmi i zjarrit në bankë, çka çoi në zbulimin e hyrjes me forcë.
Sot, rreth 200 klientë të shqetësuar u mblodhën jashtë degës bankare për të kërkuar informacion mbi sendet e tyre me vlerë. Situata u tensionua kur disa prej tyre tentuan të hynin me forcë në ambientet e bankës, duke detyruar policinë të mbyllë përkohësisht degën dhe të rrisë masat e sigurisë.