BERAT- Një aksident i rëndë ka ndodhur pasditen e kësaj të premteje në qendër të qytetit të Beratit, me pasojë plagosjen e një këmbësori.
Nga informacionet e deritqnishme bëhet me dije se ngjarja u regjistrua në aksin rrugor Axhensi-Ish-Merkata. Mjeti tip “Golf”, goditi këmbësorin 60-vjeçar, që mori plagë kritike në trup dhe kokë dhe u dërgua me urgjencë drejt Spitalit Rajonal Berat.
Automjeti dyshohet se ishte duke qarkulluar me shpejtësi në këtë rrugë dhe ka goditur një këmbësor 60-vjeçar, që po kalonte nga njëra anë e rrugës në tjetrën. I plagosuri është transportuar me ambulancë, ku konfirmohet se është futur fillimisht në sallën e operacionit pasi kishte një goditje në kokë dhe më pas është transportuar në Repartin e Urgjencës, ku ndodhet aktualisht nën kujdesin e mjekëve.
Në vendngjarje kanë shkuar forcat e Policisë Rrugore, që përpos këqyrjes së vendngjarjes po kryejnë edhe verifikimin e pamjeve të kamerave të sigurisë të bizneseve të zonës, ndërkohë që 20-vjeçari që ishte në drejtim të automjetit tip “Golf” është shoqëruar në polici, për të dhënë dëshminë e tij rreth ngjarjes./Radar.al