Një gjykatë në Kalifornia ka dhënë vendimin ndaj këngëtares Britney Spears, e cila ishte arrestuar në mars të këtij viti pasi policia e ndaloi pranë banesës së saj nën dyshimin për drejtim mjeti në gjendje të dehur.
44-vjeçarja nuk ishte e pranishme në seancë, por u përfaqësua nga avokati i saj, i cili pranoi fajësinë në emër të saj. Duke qenë se rasti u trajtua si kundërvajtje, prania personale në gjykatë nuk ishte e detyrueshme.
Sipas vendimit, çështja u klasifikua si “wet reckless”, që nënkupton pranim faji për drejtim të rrezikshëm të lidhur me alkool ose substanca. Si pjesë e dënimit, ajo do të jetë nën mbikëqyrje për 12 muaj, do të paguajë gjoba dhe do të ndjekë një program edukimi për drejtimin në gjendje të dehur.
Mediat raportuan gjithashtu se pak para seancës, Britney Spears kishte dalë nga një klinikë rehabilitimi, ku ishte trajtuar me dëshirën e saj disa javë më parë.
Pas arrestimit, përfaqësuesit e saj e kanë cilësuar ngjarjen si “të pajustifikuar”, duke theksuar se ajo do të bashkëpunojë me autoritetet dhe do të ndjekë hapat e nevojshëm ligjorë dhe mbështetës.