Gjykata e Lartë ka marrë një vendim të rëndësishëm këtë të martë lidhur me dosjen e inceneratorit të Fierit, duke pranuar rekursin e paraqitur si nga Prokuroria e Posaçme (SPAK), ashtu edhe nga të pandehurit.
Vendimi u mor në dhomë këshillimi, dhe parashikon që çështja të rikthehet sërish për shqyrtim në Gjykatën e Apelit të Posaçëm, por me një trupë të re gjyqtarësh.
Kjo nënkupton se vendimi i mëparshëm i Apelit, dhënë më 19 dhjetor 2024 nga treshja e gjyqtarëve Engert Pëllumbi, Miliana Muça dhe Dhimitër Lara, është rrëzuar.
Si prokuroria, ashtu edhe të pandehurit kishin kundërshtuar vendimin e Apelit që rikthente dosjen në GJKKO për rigjykim, duke e çuar çështjen në instancën më të lartë të drejtësisë.
Në shtator të vitit 2023, Gjykata e Posaçme e Shkallës së Parë (GJKKO) kishte dënuar ish-ministrin e Mjedisit, Lefter Koka, dhe disa të pandehur të tjerë të përfshirë në aferën e inceneratorit të Fierit.
Pas ankimimeve të bëra nga palët, Apeli vendosi ta kthente dosjen për rigjykim, vendim që tani është shfuqizuar nga Gjykata e Lartë.
Ky zhvillim pritet të rishfaqë dosjen e inceneratorëve në Apelin e Posaçëm, ku një trupë e re gjyqtarësh do të vendosë përfundimisht mbi çështjen që prej vitesh është në qendër të vëmendjes publike dhe hetimeve të SPAK-ut.