Gjykata e Fierit ka pranuar kërkesën e Prokurorisë për sekuestrimin e pasurive të Saimir Taullaut dhe familjarëve të tij, në kuadër të hetimeve pasurore ndaj tij. Vendimi është marrë nga gjyqtari Vladimir Cjapi.
Saimir Taullau njihet si kundërshtar i Aldo Bares, ish-kreut të “bandës së Lushnjës”, i cili po vuan dënimin me burg. Më herët, Taullau është hetuar edhe në kuadër të operacionit Operacioni Forca e Ligjit (OFL), lidhur me dyshime për pasuri të pajustifikuara që mendohet se burojnë nga aktivitete të paligjshme.
Sipas organit të akuzës, ai dyshohet për përfshirje në prodhim dhe trafikim të lëndëve narkotike. Prokuroria e Fierit kishte sekuestruar edhe në maj 2024 gjashtë pasuri të tjera në emër të tij dhe të afërmve, ndërsa në prill 2024 ishin vendosur masa sekuestroje mbi katër prona të tjera.
Familja Taullau njihet si rivale e grupit të Aldo Bares në Lushnjë. Në vitin 2005 u ekzekutua Baki Taullau, vëllai i Saimir Taullaut, ngjarje e lidhur me përplasjet mes grupeve rivale.
Pasuritë e sekuestruara
Sipas Prokurorisë, pasuritë e sekuestruara deri më tani përfshijnë:
Truall në lagjen “Loni Dhamo”, Lushnjë;
Arë me sipërfaqe 15,323 m² në Savër, Lushnjë;
Arë në Karbunarë e Poshtme, Lushnjë;
Apartament 128 m² në Sauk, Tiranë;
Apartament 96.17 m² në Sauk, Tiranë;
Apartament 105.57 m² në Sauk, Tiranë.
Gjykata ka miratuar kërkesën e Prokurorisë për vijimin e masës së sekuestros mbi këto pasuri, ndërsa hetimet për çështjen vijojnë.