Policia e Shtetit ka realizuar ekstradimin nga Emiratet e Bashkuara Arabe të gjashtë shtetasve shqiptarë të shpallur në kërkim ndërkombëtar, të akuzuar për përfshirje në veprimtari kriminale që lidhen me trafikun e narkotikëve, pastrimin e produkteve të veprimtarisë kriminale dhe mashtrimin kompjuterik.
Sipas njoftimit zyrtar, operacioni u zhvillua në kuadër të bashkëpunimit mes Departamentit për Marrëdhëniet Ndërkombëtare në Drejtorinë e Përgjithshme të Policisë së Shtetit dhe autoriteteve ligjzbatuese të Emirateve të Bashkuara Arabe.
Lista e shtetasve të ekstraduar, të cilët pritet të paraqiten përpara autoriteteve ligjzbatuese shqiptare, përfshin:
Kristo Qirici (alias Jetmir Hoxha, alias Jetmir Qirici), 44 vjeç.
Shkelzen Kraja, 44 vjeç.
Aleks Pepaj (alias Shkelqim Pepaj), 38 vjeç.
Devit Patrut (alias Elidon Skendaj, alias Devid Boraj, alias Fatmir Pepaj), 39 vjeç.
(Të katër shtetasit e mësipërm janë të akuzuar për veprimtari në fushën e narkotikëve dhe/ose pastrimit të produkteve të veprimtarive kriminale).
Ilir Lazri (alias Ilir Sula), 30 vjeç, i akuzuar për pastrim të produkteve të veprimtarive kriminale.
Merxhan Celiku, 34 vjeç, i akuzuar për mashtrim kompjuterik.
Policia e Shtetit theksoi se bashkëpunimi me partnerët ndërkombëtarë mbetet një prioritet në luftën kundër krimit të organizuar, me fokus lokalizimin, kapjen dhe ekstradimin e personave të shpallur në kërkim ndërkombëtar për t’i vënë ata përballë drejtësisë.