Gazetarja e Top Channel, Anila Hoxha, ka ndarë një prej episodeve më të vështira të përjetuara gjatë punës së saj si reportere në terren. E ftuar në emisionin Top Story, ajo foli për sfidat e gazetarisë së kronikës dhe presionet e vazhdueshme me të cilat përballen gazetarët.
Në rrëfimin e saj, Hoxha përmendi një episod në qytetin e Elbasanit, ku gjatë xhirimeve për një çështje gjyqësore, ajo dhe operatori u përballën me një situatë kërcënuese.
“Po filmonim në tregun agroushqimor, kur disa persona na afrohen dhe na kërkuan të ndalonim xhirimet. Na treguan armët dhe kërkuan të fshihnim pamjet. Ishte një moment shumë i tensionuar, por falë përmbajtjes sonë dhe mbështetjes nga operatori Eurgert Hoxhaj, ia dolëm ta menaxhonim situatën,” – rrëfeu gazetarja.
Ajo theksoi gjithashtu se një nga format më të zakonshme të presionit ndaj gazetarëve janë kërcënimet që prekin familjen. “Shpesh, presioni nuk vjen vetëm drejt gazetarit, por synon të godasë rrethin familjar. Në rastin tim, motra ime humbi vendin e punës pak pas ardhjes në pushtet të kësaj maxhorance. Këto janë forma të heshtura, por shumë të forta të ndikimit,” tha Hoxha.