Futbolli shqiptar dhe qyteti i Shkodrës janë sot në zi. Në moshën 80-vjeçare është ndarë nga jeta Paulin Ndoja, ish-portieri i Vllaznisë dhe i Kombëtares Shqiptare, një emër që nuk u shqua vetëm për pritjet në fushë, por edhe për qëndresën përballë padrejtësive të një kohe të vështirë.
I lindur më 19 dhjetor 1945, Ndoja u bë pjesë e historisë së Vllaznisë që në rini, duke fituar Kupën e Shqipërisë në vitin 1965 dhe më pas titullin kampion në sezonin 1971-72. Por karriera e tij e ndritur u ndërpre brutalisht nga regjimi komunist për shkak të “biografisë së keqe”. Ai refuzoi të ndahej nga e fejuara, duke zgjedhur dashurinë përpara kompromisit politik. “Dorëzo teshat, por gruan mos e lër,” i patën thënë babai dhe xhaxhai – një udhëzim që do t’i kushtonte fundin e karrierës si futbollist.
Ndërsa Kombëtarja e thërriste vazhdimisht në grumbullime, ai lejoi të luante vetëm një ndeshje zyrtare – një fitore ndaj Kinës. “Biografia më ndiqte kudo,” thoshte me dhimbje.
Më vonë, u rikthye në sport si trajner portierësh, duke dhënë kontributin e tij të çmuar për dekada me radhë. Paulin Ndoja do të kujtohet si një sportist i talentuar, por mbi të gjitha si një njeri me karakter të hekurt, që nuk pranoi të përkulej as përballë padrejtësive më të mëdha.
U prehsh në paqe, legjendë!