Federata Shqiptare e Futbollit organizoi një event falënderimi dhe mirënjohjeje për ish-trajnerin e Kombëtares shqiptare, Sylvinho, si dhe për ndihmësit e tij, Dorival dhe Pablo Zabaleta, duke vlerësuar kontributin e tyre gjatë tre viteve e gjysmë në krye të kuqezinjve.
Në ceremoninë e organizuar nga FSHF morën pjesë presidenti Armand Duka, anëtarë të Komitetit Ekzekutiv, administrata e Federatës, përfaqësues të medias, ish-futbollistë të Kombëtares, sponsorë dhe bashkëpunëtorë të institucionit.
Në një atmosferë respekti dhe vlerësimi, presidenti Duka falënderoi stafin teknik për profesionalizmin dhe përkushtimin e treguar gjatë drejtimit të ekipit Kombëtar, duke veçuar si sukses historik kualifikimin dhe pjesëmarrjen e Shqipërisë në Euro 2024.
Si shenjë mirënjohjeje, drejtuesit e FSHF-së u dhuruan trajnerëve fanella të Kombëtares me mbishkrimin “Forever”, në nder të kontributit të tyre në historinë e futbollit shqiptar.
Në fjalën e tij, Armand Duka theksoi se Sylvinho dhe bashkëpunëtorët e tij lanë gjurmë jo vetëm për rezultatet sportive, por edhe për mënyrën dinjitoze me të cilën përfaqësuan fanellën kuqezi.
Ai sqaroi se largimi i stafit teknik nuk lidhet me mungesë rezultatesh apo motivimi, por me mbylljen e një cikli dhe nisjen e një etape të re për ekipin Kombëtar.
“Gjatë këtyre tre viteve kemi përjetuar momente shumë të bukura dhe emocione të forta. Kulmi ishte vendi i parë në grup dhe kualifikimi në Euro 2024, një moment historik për Shqipërinë. Sylvinho, Dorival dhe Zabaleta dhanë maksimumin e tyre për ekipin Kombëtar dhe fituan respektin e të gjithëve”, u shpreh Duka.
Presidenti i FSHF-së shtoi se në futbollin e ekipeve kombëtare ndryshimet janë pjesë normale e procesit, pasi ndryshe nga klubet, lojtarët nuk mund të zëvendësohen dhe ndryshimi vjen përmes stafit teknik.
Në ceremoninë e lamtumirës u falënderuan edhe pjesëtarë të tjerë të stafit, mes tyre Ilir Bozhiqi, Luca Laurenti dhe Alarico Rossi, të cilët gjithashtu do të largohen nga Kombëtarja.
Në fund të fjalës së tij, Duka uroi ish-stafin kuqezi për suksese në karrierë dhe theksoi se dyert e Shqipërisë do të mbeten gjithmonë të hapura për ta.