Belinda Balluku, duket se është njeriu që u forcua më shumë politikisht këtë të dielë.
Kjo, duke qenë se tre prej njerëzve të saj, janë emëruar nga kryeministri Edi Rama ministra.
Ndaj dhe në fund të Kongresit, të gjithë dukej sikur uronin Ballukun për këtë gjë.
Pirro Vengu dhe Petrit Malaj, dy vartës të Belinda Ballukut në ministri, njëri si drejtor i Portit të Durrësit dhe tjetri në Agjencinë Kombëtare të Burimeve Natyrore sapo ishin katapultuar ministra, respektivisht tek Mbrojtja dhe tek Financat.
I treti, Ervin Hoxha edhe ky me lidhje të tërthorta me Ballukun, sapo kishte marrë postin e Taulant Ballës.
Pozicioni i privilegjuar e bën Ballukun de facto numrin dy të mazhorancës qeverisëse. Asnjë krahasim me ministra apo deputetë të tjerë që presin në ankth çfarë do të ndodhë në kongres, pa e ditur nëse fjalimi i kryetarit do t’i rrokullisë në të tatëpjetë, apo do të shtangen nga ndonjë emërim surprizë në qeveri.
